(UPDATED 03:00 PM – Sept. 04, 2024) – Umabot na sa 15 ang nasawi matapos ang hagupit ng Bagyong Enteng.
Sa situation briefing sa tanggapan ng National Disaster Risk Reduction and Management Council (NDRRMC) sa Kampo Aguinaldo, Quezon City, ito ay sinabi ni OCD Director for Operations Service Director Cesar Idio.
Ayon kay Idio, pinakamaraming naitalang nasawi ay mula sa lalawigan ng Rizal na may 8 fatalities bunsod ng pagkalunod at landslide. Tig-2 naman ang naitalang namatay sa Cebu City, Northern Samar, at Naga City dahil sa lanslide, bumigay na riprap, nakuryente at nalunod, habang 1 ang namatay sa Negros Occidental dahil sa pagkalunod.
Bukod dito, nasa 15 ang naitalang sugatan habang 21 ang naiulat na nawawala, kabilang ang 15 mangngisda sa Camarines Norte, 3 sa Samar, 2 sa Northern Samar, at isa sa Biliran.
Batay sa situational report ng NDRRMC, nasa 1,720,568 individuals sa ang apektado ng bagyo sa National Capital Region (NCR), Cordillera Administrative Region (CAR), Ilocos (Region 1), Cagayan Valley (Region 2), Central Luzon (Region 3), CALABARZON (Region 4A), Bicol (Region 5), Western Visayas (Region 6), Central Visayas (Region 7), at Eastern Visayas (Region 8).
Karamihan sa mga naapektuhan ay mula sa Bicol Region (267,073 families), kasunod ang Region 3 (86,765 families), Region 8 (38,327 families), at NCR (17,975 families).
Kabuoang 88,077 indibiduwal o 21,681 na pamilya ang nananatili sa evacuation centers sa bansa, habang 18,757 katao o 6,348 na pamilya ang nananatili sa mga kamag-anak o kaibigan.
Nasa 39 na kalsada, 16 tulay ang hindi pa rin madaanan.
Aabot naman sa 589 na bahay ang napinsala ng pagbaha at pag-ulang dala nmg bagyo.
Nasa 200,000 pesos naman ang halaga ng pinsala sa imprastraktura sa Bicol Region at isang lugar ang nagdeklara ng state of calamity.
Nagkakahalaga naman ng 33 million pesos na assistance ang naipaabot sa mga apektadong pamilya.
