CAMARINES SUR – Nasawi ang dalawang katao habang pito ang sugatan makaraang magsalpukan ang isang truck at pampasaherong bus sa Barangay Flordeliz, bayan ng Milaor nitong Huwebes, Hunyo 13, 2024.
Kinilala ang mga nasawing biktimang si Reynaldo Niebres, 56-anyos, driver ng sangko na truck, at si Mary Flor Escaro, pasahero ng bus.
Lumalabas sa imbestigasyon ng Milaor Municipal Police Station (MPS), nakatulog si Niebres sa biyahe dahilan para maokupa nito ang linya ng bus na nauwi sa salpukan.
Nakailag ang driver ng bus ngunit nasapol ng truck ang natutulog na pasaherong si Escaro.
Napag-alamang galing Batangas patungo sanang Ligao City para mag-deliver ng kargang ethanol ang truck habang galing naman na Samar patungo sana ng Manila ang bus nang mangyari ang insidente.
Nakikipag-ugnayan na ang kompanya ng naturang truck sa mga pamilya ng biktima para sa kanilang ibibigay na tulong.
