SORSOGON – Napasakamay ng awtoridad ang umano’y tulak ng ilegal na droga sa ikinasang buy-bust operation ng pinagsanib pwersa ng Philippine Drug Enforcement Agency (PDEA) Sorsogon at PDEA Masbate sa pakikipagtulungan ng Gubat Municipal Police Station (MPS) sa Purok 1, Barangay Luna Candol, Gubat, Sorsogon alas-5:17 ng hapon nitong Lunes, April 1, 2024.
Kinilala ni PDEA Sorsogon Provincial Officer Adrian Fajardo ang suspek na si Glen Gabuyo, 40-anyos, walang trabaho at residente ng nasabing lugar.
Nakumpiska sa suspek ang limang pirasong transparent plastic sachet na may lamang pinapaniwalaang shabu na may bigat na 50 gramo at nagkakahalaga ng 340,000 pesos. Bukod dito, narekober din sa suspek ang ginamit na boodle money at isang cellphone.
Aniya, itinuturing nilang isang ‘High Value Target On Illegal Drugs’ ang suspek na matagal nang under surveillance.
Nabatid na kasama rin ang suspek sa Barangay Drug Watchlist.
Nahaharap ang suspek sa kasong paglabag sa Republic Act 9165 o Comprehensive Dangerous Drugs Act of 2002.
Samantala ang bayan ng Irosin, Castilla, Donsol at Gubat na lamang umano ang sinisikap ng PDEA Sorsogon na maideklarang drug cleared ngayong taon.
