CAMARINES SUR – Nasawi ang isang ginang matapos mahagip ng tren ng Philippine National Railways (PNR) sa Barangay San Nicolas, Iriga City, Hunyo 30, 2024.
Kinilala ang biktimang si Francia Santiago y Vasquez, 58-anyos, residente ng Zone 6 parehong bayan.
Ayon kay PCMS Salvador Ampongan Jr. ang Chief PCAD Officer ng Iriga City Police Station, natalisod ang biktima habang tumatawid sa riles. Nasapul siya ng paparating na tren nang hindi siya nakatayo at nakaalis agad sa riles.
Dito na siya nabundol ng tren at sa lakas ng impact ay nakaladkad ang biktima ng halos 5 metrong layo.
Isinugod ang biktima sa ospital pero binawian din ng buhay.
Lumalabas din sa imbestigasyon na hindi napansin ng biktima ang paparating na tren kaya tumawid pa ito sa riles.
