CAMARINES SUR – Patay ang isang lalaki matapos na pagsasaksakin ng kanyang bayaw gabi nitong Hunyo 25 sa Urban Queborac, Barangay Bagumbayan Sur, Naga City
Kinilala ang biktimang si Robert Baladia y Rata, 37 anyos, tricycle driver, may live-in-partner, residente ng nasabing lugar.
Ayon kay PLTCOL. Chester Pomar, ang tagapagsalita ng Naga City Police Office habang naglalakad ang biktima sa isang eskinita sa nasabing lugar ay inabangan siya ng suspek na kaniyang bayaw na si Jeffrey Robaldos at pinagsasaksak sa dibdib.
Mabilis na tumakas ang suspek matapos ang ginawang krimen.
Hunyo 26, 2024 nang mahuli ang suspek sa Barangay Pulpog, Bula, Camarines Sur. Hindi na narekober pa ng awtoridad ang ginamit nitong panaksak.
Napag-alamang matagal ng may hindi pagkakaintindihan ang dalawa na posible umanong nag udyok sa suspek na gawin ang krimen.
Mahaharap sa kasong murder ang suspek sakaling magsampa ng reklamo ang pamilya ng biktima.
