MASBATE – Umani ng batikos mula sa mga netizens ang viral video sa social media kung saan makikita ang isang malaking sawa at nasa tabi nito ay isang pusa na pinaniniwalaang pagkain nito sa isang pribadong zoo sa Masbate City.
Personal na binisita ng mga tauhan ng City at Provincial Veterinary Office, Department of Environment and Natural Resources (DENR), Bureau of Animal Industry – Animal Health and Welfare Division, Bureau of Animal Industry Quarantine Service at ng Office of the Provincial Agriculture ang zoo nitong Martes, Hunyo 18, 2024.
May mga kaukulang dokumento naman ang establisyimento para makapag-operate ngunit may nakitang mga kakulangan ang awtoridad sa zoo kaya ipinasara ito.
Sa official statement ng Masbate City Government, titiyakin nilang iimbestigahan ang pangyayari at papanagutin sa batas ang mga dapat na managot.
